მთავარ შიგთავსზე გადასვლა

მართვის მოწმობის კატეგორიები

მართვის მოწმობის ყველა კატეგორიისა და ქვეკატეგორიის შესახებ სრული ინფორმაცია 2026 წლის მდგომარეობით — მომსახურების სააგენტოს, შსს-⁠ს №598 ბრძანებისა და საგზაო მოძრაობის კანონის მიხედვით.

D კატეგორია ავტობუსი

მინიმალური ასაკი
24 წელი
რა ბარდება
თეორია, მოედანი, ქალაქი
წინაპირობა
B კატეგორია (მინ. 1 წელი)

სატრანსპორტო საშუალება

დანიშნულებამგზავრთა გადაყვანა
დასასხდომი ადგილები8-⁠ზე მეტი(მძღოლის გარდა)

მოწმობა და ცნობა

მართვის მოწმობის ვადა5 წელი
ავტოსკოლის ცნობასავალდებულოა

მისაბმელი

არაუმეტეს 750 კგ ნებადართული მაქსიმალური მასის მქონე მისაბმელი D კატეგორიით დასაშვებია ნებისმიერ შემთხვევაში.

თუ მისაბმელის ნებადართული მაქსიმალური მასა 750 კგ-⁠ს აღემატება, საჭიროა DE კატეგორია.

თუ უკვე გაქვს მართვის მოწმობა

თეორიის გამოცდის ჩაბარება არ დაგჭირდება, თუ:

  • —C კატეგორია მიღებული გაქვს 2012 წლის 1 სექტემბრიდან 2014 წლის 15 დეკემბრამდე
  • —C1 ქვეკატეგორია მიღებული გაქვს 2012 წლის 1 აგვისტოდან 2014 წლის 15 დეკემბრამდე
  • —D1 ქვეკატეგორია მიღებული გაქვს 2012 წლის 1 აგვისტოდან 2014 წლის 15 დეკემბრამდე

თეორიული გამოცდა

D კატეგორია მოიცავს ჯამში 808 ბილეთს. გამოცდაზე მოგივა 40 ბილეთი, ჩასაბარებლად საჭიროა 36 სწორი პასუხი, ანუ 4 შეცდომის დაშვების უფლება გაქვს. გამოცდაზე დრო 40 წუთი გაქვს.

36 სწორი პასუხი4 შეცდომა

მოედნის გამოცდა

საგამოცდო მოედანზე შესასრულებელი ელემენტები:

უკუსვლით პარკირება
აღმართი
პლატფორმასთან უკუსვლით დაყენება

გამოცდა იწყება 100 ქულით. ჩაბარებულად ჩაითვლება, თუ კანდიდატი დააგროვებს მინიმუმ 61 ქულას.

სად ბარდება გამოცდები

გამოცდები ბარდება მომსახურების სააგენტოს შემდეგ ფილიალებში:

  • სხვადასხვა გამოცდა შეგიძლია სხვადასხვა ქალაქში ჩააბარო.
  • თბილისში გამოცდები არ ბარდება. თბილისთან ყველაზე ახლოს არის რუსთავის საგამოცდო ცენტრი.
D

კატეგორიას ავტომატურად მოჰყვება:

კატეგორიები:

D კატეგორია — ვრცლად

რა არის D კატეგორია

D კატეგორია იძლევა მგზავრთა გადასაყვანად განკუთვნილი ავტომობილის მართვის უფლებას, რომლის დასასხდომი ადგილების რაოდენობა (მძღოლის გარდა) აღემატება 8-⁠ს. დასასხდომი ადგილების ზედა ზღვარი D კატეგორიისთვის არ არსებობს.

დასაშვებია მისაბმელის გადაბმაც, თუ მისი ნებადართული მაქსიმალური მასა 750 კგ-⁠ს არ აღემატება, ხოლო თუ აღემატება — საჭიროა DE კატეგორია.

რა განსხვავებაა D1 და D კატეგორიებს შორის

D1 ქვეკატეგორია უფლებას გაძლევს მართო მგზავრთა გადასაყვანად განკუთვნილი ავტომობილი, რომლის სიგრძე არის მაქსიმუმ 8 მეტრი, და რომლის დასასხდომი ადგილები (მძღოლის გარდა) არის 8-⁠ზე მეტი და მაქსიმუმ 16.

თუ ავტომობილის სიგრძე 8 მეტრს აღემატება, ან ავტომობილს 16-⁠ზე მეტი დასასხდომი ადგილი აქვს, მისი მართვის უფლება მხოლოდ D კატეგორიის მფლობელს აქვს.

D კატეგორიის გამოცდები და მიღების პირობები

D კატეგორია გაიცემა 24 წლიდან და მისი წინაპირობაა B კატეგორიის მართვის მოწმობა (აღებული მინიმუმ 1 წლის წინ). ამ ვადაში არ ჩაითვლება მართვის უფლების შეჩერებისა და ჩამორთმევის დრო. ავტოსკოლის ცნობა („ძირი“) სავალდებულოა.

D კატეგორიაზე ბარდება თეორიის, მოედნისა და ქალაქის გამოცდები.

მოედნისა და ქალაქის გამოცდები ბარდება მექანიკური გადაცემათა კოლოფის მქონე D კატეგორიის ავტომობილზე (კონკრეტულად ეს არის Mercedes-Benz Intouro და Temsa Tourmalin).

D კატეგორიის თეორიის გამოცდა

თეორიის გამოცდა მოიცავს ჯამში 808 ბილეთს. გამოცდაზე მოგივა შემთხვევითობის პრინციპით არჩეული 40 ბილეთი, რომლებიდანაც მინიმუმ 36-⁠ს უნდა გასცე სწორი პასუხი — ანუ მხოლოდ 4 შეცდომის დაშვების უფლება გაქვს. გამოცდის დრო 40 წუთია. D კატეგორიის თეორიის გამოცდა ბარდება მომსახურების სააგენტოს (თბილისის გარდა).

თეორიის ჩაბარება არ დაგჭირდება, თუ:

  • C კატეგორია აღებული გაქვს 2012 წლის 1 სექტემბრიდან 2014 წლის 15 დეკემბრამდე
  • C1 ქვეკატეგორია აღებული გაქვს 2012 წლის 1 აგვისტოდან 2014 წლის 15 დეკემბრამდე
  • D1 ქვეკატეგორია აღებული გაქვს 2012 წლის 1 აგვისტოდან 2014 წლის 15 დეკემბრამდე

ჯავშნის გაუქმების შესახებ — თუ ჯავშანს გამოცდის დაწყებამდე სულ მცირე 72 საათით ადრე გააუქმებ, მომდევნო ჯავშანზე შეზღუდვა არ დაწესდება. ხოლო თუ 72 საათზე გვიან გააუქმებ ან გამოცდაზე საერთოდ არ გამოცხადდები, ახლიდან გასვლას წინა ჯავშნის დღიდან 7 დღის შემდეგ შეძლებ.

D კატეგორიის მოედნის გამოცდა

მოედნის გამოცდაზე დაიშვები მხოლოდ მას შემდეგ, რაც თეორიის გამოცდას ჩააბარებ — გარდა იმ შემთხვევისა, როცა თეორიის ჩაბარება არ გჭირდება (ზემოთ აღწერილი გამონაკლისები).

მოედნის გამოცდა სამი ელემენტისგან შედგება: უკუსვლით პარკირება, აღმართი და პლატფორმასთან უკუსვლით დაყენება. თითოეული ელემენტის შესასრულებლად მაქსიმუმ 4 წუთი გაქვს — ლიმიტის გადაცილების შემთხვევაში ჩაიჭრები.

გამოცდა იწყება 100 ქულით და ჩაბარებულად ჩაითვლება, თუ დააგროვებ მინიმუმ 61 ქულას და დისკვალიფიკაციის შეცდომას არ დაუშვებ (მაგ. საავარიო სიტუაცია ან ელემენტის გამოტოვება). ყოველი დარღვევა 40 საჯარიმო ქულაა — ანუ ერთი შეცდომაც საკმარისია ჩასაჭრელად.

მოედნის გამოცდის ჩასაბარებლად გაქვს 30 დღე (ათვლა იწყება თეორიის გამოცდის ჩაბარების დღიდან). ჩაჭრის შემთხვევაში უფასოდ ხელახლა გასვლა ყოველ 7 დღეში ერთხელ შეგიძლია, ხოლო 30 ლარის გადახდით — ყოველდღე (დღეში ერთხელ).

D კატეგორიის ქალაქის გამოცდა

ქალაქის გამოცდაზე ქულების სისტემა არ არსებობს. გამოცდა ჩაუბარებლად შეფასდება, თუ დაუშვებ 1 მძიმე ან 15 მსუბუქ შეცდომას. მარშრუტზე მოძრაობის დრო მინიმუმ 45 წუთია.

ქალაქის გამოცდაზე ყოველი გასვლა ფასიანია. გეგმიური ჯავშანი 150 ლარია და ტარდება ორშაბათიდან პარასკევის ჩათვლით; პირველად ქალაქზე გახვალ მოედნის ჩაბარებიდან 15 დღის შემდეგ, ხოლო ჩაჭრის შემთხვევაში მომდევნო გეგმიური გასვლა ჩაჭრის დღიდან 30 დღის შემდეგ გეკუთვნის. არაგეგმიური ჯავშანი 310 ლარია, ტარდება მხოლოდ შაბათს და 30-⁠დღიან ლოდინს არ ექვემდებარება. ასევე გასათვალისწინებელია, რომ ქალაქის გამოცდის დაჯავშნა ჩაჭრიდან მომდევნო დღიდან შეგიძლია.

ქალაქის გამოცდის ჩასაბარებლად გაქვს 365 დღე (ათვლა იწყება მოედნის გამოცდის ჩაბარების დღიდან); და თუ ამ ვადაში ქალაქის გამოცდას ვერ ჩააბარებ, ახლიდან მოგიწევს თეორიის და მოედნის გამოცდების ჩაბარება.

D კატეგორიის ქალაქის გამოცდაზე დამატებით ფასდება:

ეკონომიური მართვა და სხვადასხვა გარემოებაში სწორი გადაცემების შერჩევა საწვავის მოხმარების და გამონაბოლქვის შემცირების მიზნით.

შედარებისთვის, B კატეგორიაზე ეს კრიტერიუმები არ ფასდება.

D კატეგორიის გამოცდების საფასური

საფასური
თეორია — პირველი გასვლა55 ლარი
თეორია — ყოველი მომდევნო გასვლა40 ლარი
მოედანი — პირველი გასვლაუფასო
მოედანი — ხელახლა, 7 დღეში ერთხელუფასო
მოედანი — ხელახლა, ყოველდღე30 ლარი
ქალაქი — გეგმიური ჯავშანი150 ლარი
ქალაქი — არაგეგმიური ჯავშანი310 ლარი

თუ თეორიის გამოცდა არ გჭირდება (იხ. „თუ უკვე გაქვს მართვის მოწმობა"), მოედანზე პირველი გასვლა 55 ლარია, ყოველი მომდევნო — 40 ლარი (7 დღეში ერთხელ) ან 70 ლარი (ყოველდღე).

სხვა:

ჩვეულებრივ, D კატეგორია გაიცემა B კატეგორიის აღებიდან 1 წლის შემდეგ, თუმცა არსებობს გამონაკლისი - თუ C კატეგორია აღებული გაქვს 2012 წლის 1 აგვისტომდე, მაშინ B კატეგორიის ფლობა საჭირო არ არის, შეგიძლია პირდაპირ D კატეგორიის გამოცდებზე გახვიდე. ჩაბარებით ჩააბარებ როგორც თეორიის, ისე პრაქტიკის გამოცდებს.

D კატეგორიის მართვის მოწმობით ასევე შეგიძლია მართო D1 ქვეკატეგორიის ტრანსპორტი.

გზაზე მაქსიმალური სიჩქარეა 60 კმ/⁠სთ დასახლებულ პუნქტში, 70 კმ/⁠სთ დაუსახლებელ პუნქტში და 80 კმ/⁠სთ ავტომაგისტრალზე.

D კატეგორიის მოპოვება B კატეგორიაზე ავტომატიკის შეზღუდვასაც გიხსნის — ანუ თუ B მხოლოდ ავტომატიკაზე გაქვს, D-⁠ის აღებით მექანიკის მართვის უფლებას ავტომატურად მოიპოვებ.

D კატეგორიის მართვის მოწმობა გაიცემა 5 წლის ვადით. ვადის გასვლის შემდეგ მართვის მოწმობის შეცვლა გამოცდების ჩაბარების გარეშეა შესაძლებელი, მომსახურების სააგენტოს ნებისმიერ ფილიალში.

ხშირად დასმული კითხვებიFAQ

1.

რა არის D კატეგორია?

D კატეგორია არის მართვის მოწმობის კატეგორია, რომელიც უფლებას გაძლევს მართო მგზავრთა გადასაყვანად განკუთვნილი ავტომობილი, რომლის დასასხდომი ადგილების რაოდენობა 8-⁠ს აღემატება (მძღოლის გარდა); ზედა ზღვარი არ არსებობს - არც ადგილების რაოდენობაზე, არც მასაზე, არც ტრანსპორტის სიგრძეზე.

№598 ბრძანება — მუხლი 4, ნაწილი 1 „ე“

2.

აუცილებელია რომელიმე კატეგორია უკვე მქონდეს, რათა D კატეგორია ავიღო?

დიახ, აუცილებელია B კატეგორიის მართვის მოწმობა გქონდეს მინიმუმ 1 წელი. ამ ვადაში არ ჩაითვლება მართვის უფლების შეჩერებისა და ჩამორთმევის დრო.

№598 ბრძანება — მუხლი 8, ნაწილი 1

3.

D კატეგორიის აღება B კატეგორიის ფლობის გარეშე შეიძლება?

დიახ, მხოლოდ ერთ შემთხვევაში: თუ C კატეგორია 2012 წლის 1 აგვისტომდე გაქვს აღებული, B კატეგორიის ფლობა საჭირო აღარ არის და პირდაპირ D კატეგორიის გამოცდებზე გახვალ (თეორია, მოედანი, ქალაქი).

№598 ბრძანება — მუხლი 8, ნაწილი 1¹

4.

D კატეგორიით მისაბმელის გადაბმა შეიძლება?

დიახ, მაგრამ მისაბმელის ნებადართული მაქსიმალური მასა 750 კგ-⁠ს არ უნდა აღემატებოდეს. თუ მისაბმელის ნებადართული მაქსიმალური მასა 750 კგ-⁠ზე მეტია, საჭიროა DE კატეგორია.

№598 ბრძანება — მუხლი 4, ნაწილი 1 „ე“, „თ“

5.

D კატეგორიით ავტობუსის გარდა კიდევ რისი მართვა შემიძლია?

D კატეგორიის აღების შემთხვევაში ავტომატურად გადმოგეცემა D1 ქვეკატეგორია.

№598 ბრძანება — მუხლი 8, ნაწილი 4

6.

D კატეგორიით შესახსრებული ავტობუსის („აკორდეონი“) მართვა შემიძლია?

არა. შესახსრებული ავტობუსის — ე.წ. „აკორდეონის“ — მართვა მხოლოდ DE კატეგორიის მართვის მოწმობის მფლობელს შეუძლია, მიუხედავად იმისა, რომ მას მისაბმელი (E) საერთოდ არ აქვს.

№598 ბრძანება — მუხლი 11, ნაწილი 6

7.

D კატეგორიით სატვირთო ავტომობილის მართვა შემიძლია?

არა. D კატეგორია მხოლოდ მგზავრთა გადასაყვანად განკუთვნილ ავტომობილს (ავტობუსს, მიკროავტობუსს) მოიცავს. სატვირთო ავტომობილისთვის გჭირდება C1 ან C კატეგორია.

№598 ბრძანება — მუხლი 4, ნაწილი 1 „დ“, „ე“;, ნაწილი 2 „დ“

8.

მაქსიმუმ რა სიჩქარით შემიძლია მოძრაობა?

დასახლებულ პუნქტში 60 კმ/⁠სთ, დაუსახლებელ პუნქტში 70 კმ/⁠სთ, ავტომაგისტრალზე 80 კმ/⁠სთ.

საგზაო მოძრაობის კანონი — მუხლი 33, ნაწილი 6 და 7 „ვ“

9.

რამდენი წლით გაიცემა D კატეგორიის მართვის მოწმობა?

D კატეგორიის მართვის მოწმობა გაიცემა 5 წლის ვადით.

№598 ბრძანება — მუხლი 41, ნაწილი 1 „გ.ა“

10.

მართვის მოწმობაზე ვადა გამივიდა, როგორ მოვიქცე?

მართვის მოწმობაზე ვადის გასვლის შემდეგ მისი შეცვლა შესაძლებელია გამოცდების ჩაბარების გარეშე, მომსახურების სააგენტოს ნებისმიერ ფილიალში.

შსს მომსახურების სააგენტო

1.

D კატეგორიაზე რომელი გამოცდები ბარდება?

თეორია, მოედანი და ქალაქი.

№598 ბრძანება — მუხლი 8, ნაწილი 2; მუხლი 37²; მუხლი 38¹

2.

რამდენი ბილეთი შედის D კატეგორიის თეორიის გამოცდაში?

ჯამში შედის 808 ბილეთი. გამოცდაზე მოგივა შემთხვევითობის პრინციპით არჩეული 40 ბილეთი, რომლებიდანაც მინიმუმ 36-⁠ს უნდა გასცე სწორი პასუხი, ანუ მხოლოდ 4 შეცდომის დაშვების უფლება გაქვს. გამოცდის დრო — 40 წუთი.

№598 ბრძანება — მუხლი 28 „ვ“

3.

თეორიის გამოცდის ჯავშნის გაუქმება შემიძლია?

დიახ. თუ ჯავშანს გამოცდის დაწყებამდე სულ მცირე 72 საათით ადრე გააუქმებ, მომდევნო ჯავშანზე შეზღუდვა არ დაწესდება. ხოლო თუ 72 საათზე გვიან გააუქმებ ან გამოცდაზე საერთოდ არ გამოცხადდები, ახლიდან გასვლას წინა ჯავშნის დღიდან 7 დღის შემდეგ შეძლებ.

№598 ბრძანება — მუხლი 21¹, ნაწილი 8

4.

24 წლიდან შემიძლია ავიღო D კატეგორიის მართვის მოწმობა?

დიახ, D კატეგორია სწორედ 24 წლიდან გაიცემა.

№598 ბრძანება — მუხლი 8, ნაწილი 3

5.

ავტოსკოლის ცნობა მჭირდება გამოცდაზე გასასვლელად?

დიახ, D კატეგორიის გამოცდებზე გასასვლელად ავტოსკოლის ცნობა („ძირი“) სავალდებულოა.

შსს მომსახურების სააგენტო

6.

მოედნის გამოცდა რამდენი ელემენტისგან შედგება?

მოედნის გამოცდა შედგება 3 ელემენტისგან: უკუსვლით პარკირება, აღმართი და პლატფორმასთან უკუსვლით დაყენება.

№598 ბრძანება — მუხლი 37², ნაწილი 1 „ა“

7.

D კატეგორიაზე მოედნის გამოცდა როგორ ფასდება?

გამოცდა იწყება 100 ქულით და ჩაბარებულად ჩაითვლება, თუ დააგროვებ მინიმუმ 61 ქულას და დისკვალიფიკაციის შეცდომას არ დაუშვებ (მაგ. საავარიო სიტუაცია ან ელემენტის გამოტოვება). ყოველი დარღვევა 40 საჯარიმო ქულაა — ანუ საკმარისია ერთი შეცდომა და გამოცდა ჩაუბარებლად შეფასდება, ვინაიდან დარჩება 60 ქულა, რაც 61-⁠ზე ნაკლებია.

№598 ბრძანება — მუხლი 35, ნაწილი 1; მუხლი 37², ნაწილი 2

8.

მოედნის გამოცდაზე დროის ლიმიტი მაქვს?

დიახ — მაქსიმუმ 4 წუთი თითოეული ელემენტის შესასრულებლად. 4 წუთიანი ლიმიტის გადაცილების შემთხვევაში გამოცდა ჩაუბარებლად შეფასდება.

№598 ბრძანება — მუხლი 35, ნაწილი 2¹ „ბ“

9.

ქალაქის გამოცდა როგორ ფასდება D კატეგორიაზე?

ქალაქის გამოცდაზე ქულების სისტემა საერთოდ არ არსებობს. გამოცდა ჩაუბარებლად შეფასდება, თუ კანდიდატი დაუშვებს 1 მძიმე ან 15 მსუბუქ შეცდომას. ქალაქის გამოცდის მარშრუტზე მოძრაობის დრო მინიმუმ 45 წუთია.

№598 ბრძანება — მუხლი 38⁶, ნაწილი 1; მუხლი 38¹, ნაწილი 4

10.

ქალაქის გამოცდაზე დამატებით რა კრიტერიუმებს აფასებენ D კატეგორიაზე?

ეკონომიურ მართვას და სხვადასხვა გარემოებაში სწორი გადაცემების შერჩევას საწვავის მოხმარების და გამონაბოლქვის შემცირების მიზნით. შედარებისთვის, ეს კრიტერიუმები B კატეგორიაზე არ ფასდება.

№598 ბრძანება — მუხლი 38³ „ბ.კ“

11.

მოედნის გამოცდაზე ჩავიჭერი, როდის შემიძლია ხელახლა გასვლა?

მოედნის გამოცდის ჩასაბარებლად გაქვს 30 დღე (ათვლა იწყება თეორიის გამოცდის ჩაბარების დღიდან). მოედნის გამოცდაზე ჩაჭრის შემთხვევაში, ხელახლა უფასოდ გასვლა შეგიძლია ყოველ 7 დღეში ერთხელ, ხოლო 30 ლარის გადახდის შემთხვევაში გასვლას შეძლებ ყოველდღე (დღეში ერთხელ).

№598 ბრძანება — მუხლი 24², ნაწილი 1 „ა“ და 2 | საფასურის კანონი — მუხლი 6 „ძ“

12.

D კატეგორიის მოპოვება B კატეგორიაზე ავტომატიკის შეზღუდვას მიხსნის?

დიახ. თუ B კატეგორია მხოლოდ ავტომატიკაზე გაქვს, D კატეგორიის აღებით მექანიკის მართვის უფლებას ავტომატურად მოიპოვებ.

№598 ბრძანება — მუხლი 6¹, ნაწილი 6 „გ“