AM კატეგორია

თუ გინდა, რომ მოპედით იმოძრაო და ჯერ არ გაქვს შესაბამისი მართვის მოწმობა, ალბათ გაგიგია AM კატეგორიის შესახებ. მოპედი არის ყველაზე მარტივად სამართავი და ერთ-ერთი ყველაზე ბიუჯეტური ტრანსპორტი ქალაქში სამოძრაოდ. ამ სტატიაში წარმოდგენილია სრული ინფორმაცია მოპედის, ანუ AM კატეგორიის მართვის მოწმობის შესახებ.

რა არის AM კატეგორია

AM კატეგორია მოიცავს ორ სატრანსპორტო საშუალებას - ეს არის მოპედი და მსუბუქი კვადროციკლი. ამ ორიდან ყველაზე მეტად გავრცელებული კი არის მოპედი, ამიტომ ამ სტატიაში ინფორმაცია ძირითადად მოპედზე იქნება წარმოდგენილი.

მოპედი

არის ყველა ორ ან სამ ბორბლიანი მექანიკური ტრანსპორტი, რომლის ძრავის მოცულობა არ აღემატება 50 კუბურ სანტიმეტრს და რომლის კონსტრუქციული სიჩქარე აღემატება 25 კმ/სთ-ს მაგრამ არ აღემატება 45კმ/სთ-ს.

მსუბუქი კვადროციკლი

არის ოთხბორბლიანი მექანიკური ტრანსპორტი, რომლის ძრავის მოცულობა, ანალოგიურად მოპედისა, არ აღემატება 50 კუბურ სანტიმეტრს და რომლის კონსტრუქციული სიჩქარე აღემატება 25 კმ/სთ-ს მაგრამ არ აღემატება 45კმ/სთ-ს.

რატომ უნდა აიღოთ AM კატეგორიის მართვის მოწმობა

მოპედით ქალაქში გადაადგილება ბევრად სწრაფია, ვიდრე ავტომობილით (არ ხარ საცობში).
ბენზინიც ნაკლები უნდა - დაახლოებით 3 ან 4 ლიტრი ყოველ 100 კმ-ზე.
შეგიძლია კურიერად იმუშაო.
შეგიძლია დამოუკიდებლად იარო სკოლაში, უნივერსიტეტში ან მეგობრებთან.

რა განსხვავებაა A1 და AM კატეგორიებს შორის?

ქართულ ზეპირმეტყველებაში სიტყვა „მოპედი“ ავტომატურად გათანაბრებულია AM კატეგორიის სატრანსპორტო საშუალებასთან, თუმცა ეს მთლად სიმართლეს არ შეესაბამება. მოპედი შეიძლება როგორც AM, ისე A1 კატეგორიაშიც კი გადიოდეს - და ამას წყვეტს მისი ძრავის კუბატურა. AM მოიცავს 50 კუბატურამდე მოპედებს, ხოლო 50-ზე მეტი და 125 კუბატურზე ნაკლები უკვე A1 კატეგორიაა, ანუ მსუბუქი მოტოციკლი. ამიტომ, თუ მოპედი მაგალითად 100 კუბატურიანია, მის მართვას AM კატეგორიის მართვის მოწმობით ვეღარ შეძლებთ, ამ დროს უკვე A1 კატეგორიის მართვის მოწმობაა საჭირო.

	AM	A1
სიმძლავრე	< 4კვტ (კილოვატი)	< 11 კვტ (კილოვატი)
კუბატურა	< 50cc	< 125cc

როგორ ავიღოთ AM კატეგორიის მართვის მოწმობა

AM კატეგორიაზე ასაკი განსაზღვრულია - მისი მართვის მომწობის ასაღებად უნდა იყოთ მინიმუმ 16 წლის და მომსახურების სააგენტოს ნებისმიერ ფილიალში ჩააბაროთ მხოლოდ თეორიის გამოცდა. აქვე აღსანიშნავია, რომ თუ გაქვთ ნებისმიერი კატეგორიის მართვის მოწმობას, უფლება გაქვთ მართოთ AM კატეგორიის სატრანსპორტო საშუალებები, ხოლო თუ არ გაქვთ, მისი ცალკე აღებაც შესაძლებელია.

AM კატეგორიის თეორიის გამოცდა

თეორიის გამოცდა მოიცავს 328 ბილეთს. მიუხედავად იმისა, რომ AM კატეგორიის თეორიის გამოცდა სხვა კატეგორიებთან შედარებით 3-ჯერ ნაკლებ ბილეთს მოიცავს, მასში შეტანილია საგზაო მოძრაობის ყველა წესი.

გამოცდაზე შემთხვევითობის პრინციპით არჩეული 20 ბილეთი მოგივათ, რომლიდანაც მინიმუმ 18-ს უნდა გასცეთ სწორი პასუხი, ანუ მხოლოდ 2 შეცდომის დაშვების უფლება გაქვთ.

აქვე აღსანიშნავია, რომ AM კატეგორიის თეორიის გამოცდაზე ვიზიტის წინასწარ დაჯავშნა სავალდებულო არ არის. როცა მოგესურვებათ, მიხვალთ მომსახურების სააგენტოში და მაშინვე ჩააბარებთ გამოცდას.

AM კატეგორიის თეორიის სრული მასალა შეგიძლიათ ჩვენი კურსით შეისწავლოთ.

რა უნდა წარვადგინოთ გამოცდაზე გასასვლელად?

მომსახურების სააგენტოში უნდა წარადგინოთ:

პირადობის მოწმობა
ფორმა 100
დაბადების მოწმობის დედანი (ან მისი ნოტარიულად დამოწმებული ასლი)
- არასრულწლოვანმა პირმა უნდა წარადგინოს ზემოთხსენებული დოკუმენტები და დამატებით გამოცდაზე უნდა გამოცხადდეს მშობელთან ერთად ან წარმოადგინოს მშობლის ნოტარიული წესით დამოწმებული თანხმობა.

საფასური

ფორმა 100 - დაახლოებით 30 ლარი
გამოცდაზე გასვლა - პირველად 15 ლარი, ყოველ შემდეგ ჯერზე კი 40 ლარი.

დაჩქარებული წესით მართვის მოწმობის დამზადების ვადები და საფასურები:

სტანდარტულად, მართვის მოწმობა მზადდება გამოცდის წარმატებით ჩაბარებიდან 5 სამუშაო დღის ვადაში, ხოლო თუ ვადაზე ადრე გსურთ მისი მიღება, ეს, ბუნებრივია, ფასიანია:

ერთ სამუშაო დღეში დამზადების საფასური - 50 ლარი.
ორ სამუშაო დღეში დამზადების საფასური - 40 ლარი.

როგორ ვმართოთ AM კატეგორიის სატრანსპორტო საშუალება (მოპედი)

თუ ოდესმე ველოსიპედი გიტარებიათ, ბალანსის მხრივ მოპედის მართვაც მისი მსგავსია, თუმცა მაინც აქვს გარკვეული წესები და სხვადასხვა დეტალები, რაც უნდა იცოდე, რომ გზაზე უსაფრთხოდ და თავდაჯერებულად გადაადგილება შეძლო.

მოპედების უმეტესობას ერთსიჩქარიანი ავტომატური გადაცემათა კოლოფი აქვს — ანუ სიჩქარეების ხელით გადართვა არ გიწევთ, უბრალოდ მარჯვენა ხელის ბერკეტს ჩამოწევთ და მიდიხართ. მართვისას აუცილებელია, რომ ორივე ხელით გეჭიროთ საჭე.

რაც შეეხება ხელის მუხრუჭებს - მარცხენა მუხრუჭი უკანა ბორბალს აჩერებს, მარჯვენა კი წინას.

დამატებითი რჩევები:

ყოველთვის ატარეთ ჩაფხუტი
გაუსწარით ყველას მარცხენა მხრიდან
წვიმიან ამინდში ნელა იმოძრავეთ
დღეც და ღამეც წინა ფარები აანთეთ
გამოიყენეთ სარკეები

და რაც მთავარია — თავდაპირველად მართვა შეისწავლეთ ისეთ ადგილზე, სადაც ნაკლებად ინტენსიური მოძრაობაა. რამდენიმე დღე სავსებით საკმარისია, რომ მოპედის თავდაჯერებულად მართვა შეძლოთ.

საუკეთესო მოპედები, რომელსაც AM კატეგორიის მართვის მოწმობით ატარებთ

Honda Dio და Honda Today

უპირატესობები:

მარტივი სამართავი - ავტომატური გადაცემათა კოლოფი (CVT) დაგეხმარებათ დამწყებ მძღოლებს, რომ კონცენტრირდეთ გზასა და მოძრაობაზე და არა სიჩქარეების ხელით გადართვაზე.
ეკონომიური - წვავს დაახლოებით 2 ლიტრ ბენზინს ყოველ 100 კმ-ზე.
იაფი - მეორად მდგომარეობაში Honda Dio-ს შეძენა საქართველოში შეგიძლიათ დაახლოებით 1500 ლარად.
გამძლე - Honda-ს ბრენდი გამოირჩევა გამძლეობით როგორც ავტომობილებში, ისე მოპედებსა და მოტოციკლებში.

უარყოფითი მხარეები:

სიჩარე - Honda-ს Dio და Today მოდელები საკმაოდ ნელი მოპედებია, მაქსიმალური სიჩქარე დაახლოებით 45 კმ/სთ აქვთ.
სამუხრუჭო სისტემა - ბევრ მოდელს აქვს წინა დრუმი (დრამ) მუხრუჭი. სასურველია, დისკური წინა მუხრუჭიანი ვერსია შეიძინოთ უკეთესი გაჩერების ძალისთვის.
მეორადი ბაზარი - საქართველში მეორად ბაზარზე ძირითადად მაღალი გარბენის Honda Dio-ს da Honda Today-ს მოდელები იყიდება.

გამოქვეყნების თარიღი: 20.05.2025

რა სერვისები გაქვთ?

B კატეგორიის თეორიის კურსი (12 გაკვეთილი). A კატეგორიის თეორიის კურსი (10 გაკვეთილი) AM კატეგორიის თეორიის კურსი (7 გაკვეთილი). ინდივიდუალური გაკვეთილები (დისტანციური პირადი გაკვეთილები + კურსზე, ანუ ვიდეო ჩანაწერებზე სამუდამო წვდომა).
როგორ მივიღო წვდომა ვიდეო გაკვეთილებზე?

ვიდეო-გაკვეთილებზე, ანუ ჩანაწერებზე წვდომა სამივე ვარიანტის შეძენის შემთხვევაში გექნებათ. განსხვავება დამატებით მომსახურებებშია.
რამდენ ხანს მაქვს წვდომა კურსზე?

კურსზე წვდომა არის სამუდამო. ვიდეო გაკვეთილებს (ჩანაწერებს) შეგიძლიათ უყუროთ როდესაც გსურთ და რამდენჯერაც გსურთ.
როგორ ტარდება ინდივიდუალური გაკვეთილები?

ინდივიდუალური გაკვეთილები ტარდება ონლაინ, დისტანციურად, თქვენთვის მოსახერხებელ დროს.
რა მოწყობილობებზე შემიძლია ვიდეო გაკვეთილების ყურება?

ვიდეო გაკვეთილების ყურება შესაძლებელია ნებისმიერ მოწყობილობაზე: კომპიუტერი, პლანშეტი, მობილური ტელეფონი.
ვარ 17 წლის, მინდა მართვის მოწმობის გამოცდაზე გასვლა, ამისთვის აუცილებელია თუ არა მშობლის მოყვანა, ხომ არ არსებობს სხვა ალტერნატიული გზა?

თუ თქვენ ხართ 17 წლის არასრულწლოვანი, მართვის მოწმობის გამოცდაზე დასაშვებად მშობლის ნოტარიულად დამოწმებული თანხმობის წარდგენაც საკმარისია.
რა უნდა წარვადგინო მართვის მოწმობის გამოცდაზე გასასვლელად?

განცხადება; ჯანმრთელობის მდგომარეობის შესახებ ცნობა (ფორმა IV 100/ა); პირადობის მოწმობა; კანონით გათვალისწინებული საფასურის გადახდის დამადასტურებელი ქვითრები; სატრანსპორტო საშუალების იმ კატეგორიის შესაბამისი სწავლების დამადასტურებელი მოწმობა, რომელზეც გავლილია პროფესიული მომზადება ან გადამზადება ("A" და "B" კატეგორიის სატრანსპორტო საშუალებათა მართვის უფლების მისაღებად დასაშვებია მძღოლობის კანდიდატთა დამოუკიდებელი მომზადება).
„B“ კატეგორიის სატრანსპორტო საშუალების მართვის უფლების მისაღები თეორიული გამოცდის ჩაბარების შემდეგ რა ვადაში უნდა ჩავაბარო პრაქტიკული გამოცდა?

თეორიული გამოცდის წარმატებით ჩაბარებიდან 30 კალენდარული დღის განმავლობაში ტარდება პრაქტიკული გამოცდის პირველი ეტაპი, ხოლო მეორე ეტაპი ტარდება პირველი ეტაპის წარმატებით ჩაბარებიდან 365 კალენდარული დღის განმავლობაში.
რა ვადა მეძლევა პრაქტიკული გამოცდის მეორე ეტაპზე გასასვლელად?

მძღოლობის კანდიდატს, რომელმაც წარმატებით ჩააბარა პრაქტიკული გამოცდის პირველი ეტაპი, უფლება აქვს პრაქტიკულ გამოცდის მეორე ეტაპზე გავიდეს პრაქტიკული გამოცდის პირველი ეტაპის წარმატებით ჩაბარებიდან 365 კალენდარული დღის განმავლობაში.
როგორ ხდება პრაქტიკული გამოცდის მეორე ეტაპზე დაშვება

პრაქტიკული გამოცდის მეორე ეტაპზე დაშვება ხდება პირველი ეტაპის წარმატებით ჩაბარების შემდეგ. გამოცდაზე გასასვლელად საჭიროა დაინტერესებულმა პირმა დაჯავშნოს რიგი. რიგის დაჯავშნა შესაძლებელია როგორც სააგენტოს სტრუქტურულ ერთეულში, ასევე ვებგვერდის, მობილური აპლიკაციის ან სწრაფი გადახდის ტერმინალის საშუალებით.
რა არის პრაქტიკულ გამოცდაზე გასვლის საფასური?

„B“ ან „BE“ კატეგორიის სატრანსპორტო საშუალების მართვის უფლების მისაღები პრაქტიკული გამოცდის (როგორც მექანიკური ასევე ავტომატური გადაცემათა კოლოფის სატრანსპორტო საშუალებაზე) პირველ ეტაპზე დაშვება (გარდა დაჩქარებული მომსახურებისა) ხორციელდება საფასურის გარეშე, ხოლო მეორე ეტაპზე ერთჯერადად დაშვების საფასური (გარდა დაჩქარებული მომსახურებისა) შეადგენს 90 ლარს.
რა დროს უნდა გამოვცხადდე პრაქტიკული გამოცდის მეორე ეტაპზე და რა მოხდება თუ დაჯავშნილ დროს არ გამოვცხადდები გამოცდაზე?

მძღოლობის კანდიდატი ვალდებულია პრაქტიკული გამოცდის მეორე ეტაპზე გამოცხადდეს რიგის ჯავშნით გათვალისწინებულ დრომდე 15 წუთით ადრე. გამოცდაზე მძღოლობის კანდიდატის აღნიშნული დროის დარღვევით გამოცხადების ან გამოუცხადებლობის შემთხვევაში ხდება მძღოლობის კანდიდატის დისკვალიფიკაცია. აღნიშნულ შემთხვევაში მძღოლობის კანდიდატს გადახდილი მომსახურების საფასური უბრუნდება მხოლოდ ნაწილობრივ (საფასურის 50 %) კანონით დადგენილი წესით. რიგის შემდგომი დაჯავშნა დაიშვება წინა რიგის დაჯავშნის დღიდან 30 კალენდარული დღის გასვლის შემდეგ, ხოლო გამოცდაზე დაშვება შესაძლებელია დისკვალიფიკაციიდან არაუადრეს 90 კალენდარული დღისა. ზემოთ მითითებული შეზღუდვა არ ვრცელდება, თუ მძღოლობის კანდიდატი გამოცდაზე გამოცხადების დრომდე 72 საათით ადრე გააუქმებს ჯავშანს ან შეცვლის ჯავშნის დროს.
მეორე ეტაპზე უარყოფითი შეფასების მიღების შემთხვევაში შემდეგი გასვლის უფლება როდის მომენიჭება?

პრაქტიკული გამოცდის მეორე ეტაპზე უარყოფითი შეფასების მიღების შემთხვევაში იმავე კატეგორიის სატრანსპორტო საშუალების მართვის უფლების მისაღები მორიგი პრაქტიკული გამოცდის მეორე ეტაპზე პირის დაშვება შესაძლებელია ბოლო უარყოფითი შეფასების მიღებიდან არაუადრეს 30 კალენდარულო დღისა.
თუ მძღოლობის კანდიდატი პრაქტიკული გამოცდის პირველ ეტაპს ჩააბარებს მექანიკურ გადაცემათა კოლოფის მქონე სატრანსპორტო საშუალებით, ექნება თუ არა შესაძლებლობა, მეორე ეტაპის პრაქტიკულ გამოცდაზე გავიდეს ავტომატურ გადაცემათა კოლოფის მქონე სატრანსპორტო საშუალებით?

მძღოლობის კანდიდატი პრაქტიკული გამოცდის პირველი ეტაპის მექანიკური გადაცემათა კოლოფის მქონე „B“ ან „BE“ კატეგორიის სატრანსპორტო საშუალებით წარმატებით ჩაბარების შემთხვევაში, პრაქტიკული გამოცდის მეორე ეტაპზე დაიშვება როგორც მექანიკურ გადაცემათა კოლოფის მქონე, ისე ავტომატურ გადაცემათა კოლოფის მქონე შესაბამისი კატეგორიის სატრანსპორტო საშუალებით.თუ მძღოლობის კანდიდატი პრაქტიკული გამოცდის პირველ ეტაპს ჩააბარებს მექანიკური გადაცემათა კოლოფის მქონე სატრანსპორტო საშუალებით, ხოლო მეორე ეტაპს ავტომატური კადაცემათა კოლოფის მქონე სატრანსპორტო საშაულებით, მას მიენიჭება ავტომატური გადაცემათა კოლოფის მქონე შესაბამისი სატრანსპორტო საშუალების მართვის უფლება.
პრაქტიკული გამოცდა წარმატებით ჩავაბარე, რამდენ ხანში იქნება მართვის მოწმობა მზად?

თქვენი მართვის მოწმობა დამზადდება 7 დღეში და მისი დამზადებისთანავე მიიღებთ შეტყობინებას თქვენ მიერ მითითებულ ნომერზე.
რა ვადით გაიცემა მართვის მოწმობა?

„A“, „B“, „BE“, „T“, „S“, „A1“ და „B1“ კატეგორიებისა და ქვეკატეგორიების სატრანსპორტო საშუალებათა მართვის უფლების მინიჭების დამადასტურებელი მართვის მოწმობა გაიცემა 15 წლის ვადით, ხოლო „C“, „CE“, „D“, „DE“, „C1“, „C1E“, „D1“, „D1E“ და ტრავმაიას კატეგორიებისთვის 5 წლით. საერთაშორისო მართვის მოწმობის მოქმედების ვადა კი განისაზღვრა 3 წლით. მოქმედების ვადის ამოწურვის შემდგომ, მართვის მოწმობის შეცვლა მოხდება მართვის უფლების მისაღები გამოცდის ჩაბარების გარეშე, ჯანმრთელობის მდგომარეობის შესახებ ცნობის წარდგენის საფუძველზე.