A კატეგორია
თუ გსურთ მოტოციკლით საქართველოს გზებზე ლეგალურად გადაადგილება, მაშინ აუცილებლად დაგჭირდებათ A კატეგორიის მართვის მოწმობა. ეს კატეგორია საშუალებას გაძლევთ ატაროთ ნებისმიერი ტიპის მოტოციკლი — მცირე მოცულობიდან დაწყებული, ძლიერ ძრავიან მოდელებამდე. ამ სტატიაში გაიგებთ ყველაფერს, რაც საჭიროა A კატეგორიის მართვის მოწმობის მისაღებად: ასაკობრივ მოთხოვნებს, გამოცდების ფორმატს, საფასურსა და იმ განსხვავებებს, რაც A, A1 და A2 კატეგორიებს შორის არსებობს.
რა არის A კატეგორია
A კატეგორია არის იგივე მოტოციკლის მართვის მოწმობის კატეგორია, მოტოციკლები კი თავისებურად განსხვავდება ერთმანეთისგან ძრავის მოცულობით, წონითა და სიმძლავრით. სწორედ ეს ფაქტორები განაპირობებს მოტოციკლის სიჩქარეს. ვინაიდან სხვადასხვა ტიპის და სიჩქარის მოტოციკლები არსებობს, ისინი ბუნებრივია იყოფა სხვადასხვა კატეგორიებად: A1, A2 და A. როგორც უკვე ვთქვით, A კატეგორია ნებისმიერი ტიპის მოტოციკლს მოიცავს.
მოტოციკლების სრულ უმრავლესობას მექანიკური გადაცემათა კოლოფი აქვს.
რა განსხვავებაა A1, A2 და A კატეგორიებს შორის?
-
A1 კატეგორია:
არის მოტოციკლი, რომლის ძრავის მოცულობა არ აღემატება 125 კუბურ სანტიმეტრს და რომლის სიმძლავრე არის მაქსიმუმ 11 კვტ (კილოვატი).
-
A2 კატეგორია:
არის მოტოციკლი, რომლის სიმძლავრე არის მაქსიმუმ 35 კვტ (კილოვატი) და მისი სიმძლავრე შეფარდებული წონის კოეფიციენტი არის 0.2-ზე ნაკლები (სიმძლავრე/წონა < 0.2).
-
A კატეგორია:
არის ნებისმიერი ძრავის მოცულობის, სიმძლავრისა და წონის მოტოციკლი.
A1 | A2 | A | |
|---|---|---|---|
კუბატურა | < 125cc | არ არის განსაზღვრული | ∞ |
სიმძლავრე | < 11 კვტ (კილოვატი) | < 35 კვტ (კილოვატი) | ∞ |
სიმძლავრე/წონა | არ არის განსაზღვრული | < 0.2 | ∞ |
რატომ უნდა აიღოთ A კატეგორიის მართვის მოწმობა
თუ მოტოციკლს უკვე ატარებთ და შესაბამისი მართვის მოწმობა არ გაქვთ, ამისთვის 200 ან 1200 ლარით დაჯარიმდებით - პირველ რიგში სწორედ ამიტომ უნდა აიღოთ ამ კატეგორიის მართვის მოწმობა. ხოლო თუ მოტოციკლი არ გყავთ, გეტყვით მისი შეძენის რამდენიმე უპირატესობას:
-
მოტოციკლით ქალაქში გადაადგილება ბევრად უფრო სწრაფია (არ ხარ საცობში)
-
ბენზინის წვა საკმაოდ ცოტა აქვს - დაახლოებით 4 ლიტრი ყოველ 100 კმ-ზე
-
შეგიძლია კურიერად იმუშაო
-
შეგიძლია დამოუკიდებლად იარო უნივერსიტეტში ან მეგობრებთან.
-
ძრავის ხმაური და მართვის დინამიკა - რაც ბედნიერებას, მოტივაციას და ენერგიას ზრდის
ბევრი ადამიანი ამბობს, რომ მოტოციკლზე ჯდომა მათთვის ერთგვარი თერაპიაა, ასე რომ, A კატეგორია მხოლოდ მართვის უფლება არაა — ეს არის ერთგვარი ბილეთი თავისუფლებისთვის.
აქვე აღსანიშნავია, რომ A კატეგორიის აღების შემთხვევაში, ავტომატურად გადმოგეცემათ A1, A2 და AM კატეგორიები და ტრიციკლის მართვის უფლება, რომლის მაქსიმალური სიმძლავრე არ აღემატება 15 კვტ-ს.
როგორ ავიღოთ A კატეგორიის მართვის მოწმობა
A კატეგორიაზე ასაკი განსაზღვრულია - მართვის მოწმობა გაიცემა 24 წლიდან, ან 21 წლიდან თუ მინიმუმ 2 წელია რაც ფლობთ A2 კატეგორიის მართვის მოწმობას. მართვის მოწმობის მისაღებად უნდა მიხვიდეთ მომსახურების სააგენტოს ნებისმიერ ფილიალში და ჩააბაროთ თეორიისა და მოედნის გამოცდები.გამოცდების ჩაბარება შეგიძლიათ ორშაბათიდან-შაბათის ჩათვლით.
შენიშვნა:
A კატეგორიის მისაღებად აბარებთ მხოლოდ მოედნის გამოცდას, თუ:
-
გაქვთ A2 კატეგორიის მართვის მოწმობა
-
გაქვთ B კატეგორიის მართვის მოწმობა, აღებული 2014 წლის 15 დეკემბრამდე.
A კატეგორიის თეორიის გამოცდა
თეორიის გამოცდა მოიცავს 762 ბილეთს და მასში შეტანილია საგზაო მოძრაობის ყველა წესი. გამოცდაზე შემთხვევითობის პრინციპით არჩეული 30 ბილეთი მოგივათ, რომლიდანაც მინიმუმ 27-ს უნდა გასცეთ სწორი პასუხი, ანუ მხოლოდ 3 შეცდომის დაშვების უფლება გაქვთ.
A კატეგორიის თეორიის გამოცდაზე ვიზიტის წინასწარ დაჯავშნა სავალდებულოა. დაჯავშნა შეგიძლიათ როგორც ადგილზე მისვლით, ისე ონლაინ მომსახურების სააგენტოს ვებგვერდზე.
A კატეგორიის თეორიის სრული მასალა შეგიძლიათ ჩვენი კურსით შეისწავლოთ.
A კატეგორიის მოედნის გამოცდა
თეორიის გამოცდის წარმატებით ჩაბარების შემთხვევაში, 30 კალენდარული დღის განმავლობაში უნდა ჩააბაროთ მოედნის გამოცდა, რომელიც სამ ელემენტს მოიცავს:
-
რვიანი
-
ზიგზაგი
-
საგაბარიტო წრეში მობრუნება
მოედნის გამოცდაზე ვიზიტის წინასწარ დაჯავშნა სავალდებულო არ არის.
სად ჩავაბაროთ A კატეგორიის გამოცდები საქართველოში
მოტოციკლის მართვის მოწმობის ასაღებად თეორიისა და მოედნის გამოცდების ჩაბარება საქართველოს მომსახურების სააგენტოს შემდეგ ფილიალებში შეგიძლიათ:
რა უნდა წარვადგინოთ გამოცდაზე გასასვლელად?
თეორიის გამოცდაზე გასასვლელად, მომსახურების სააგენტოში უნდა წარადგინოთ:
-
პირადობის მოწმობა
-
ფორმა 100
მოედნის გამოცდაზე გასასვლელად არაფრის წარდგენა არ არის სავალდებულო.
საფასური
-
ფორმა 100 - დაახლოებით 30 ლარი
-
თეორიის გამოცდაზე გასვლა - პირველად 55 ლარი, ყოველ შემდეგ ჯერზე კი 40 ლარი.
-
მოედნის გამოცდაზე გასვლა - 7 დღეში ერთხელ უფასოა, ვადამდელი კი 30 ლარი.
-
აქვე აღსანიშნავია, რომ 30 ლარის გადახდის შემთხვევაში, მოედნის გამოცდაზე გასვლა ერთ დღეში რამდენიმეჯერაც კი შეგიძლიათ.
-
დაჩქარებული წესით მართვის მოწმობის დამზადების ვადები და საფასურები:
სტანდარტულად, მართვის მოწმობა მზადდება გამოცდის წარმატებით ჩაბარებიდან 5 სამუშაო დღის ვადაში, ხოლო თუ ვადაზე ადრე გსურთ მისი მიღება, ეს, ბუნებრივია, ფასიანია:
-
ერთ სამუშაო დღეში დამზადების საფასური - 50 ლარი.
-
ორ სამუშაო დღეში დამზადების საფასური - 40 ლარი.
როგორ ვმართოთ A კატეგორიის სატრანსპორტო საშუალება (მოტოციკლი)
მოტოციკლის მართვა სულ სხვა ტიპის გამოცდილებაა — მართვის ტექნიკა, სხეულის კონტროლი და ყურადღება სრულად ერთად მუშაობს. გეტყვით რამდენიმე აუცილებელ დეტალს, რაც უნდა იცოდეთ მოტოციკლის სწორად და უსაფრთხოდ მართვისთვის:
-
მუდმივად ატარე ჩაფხუტი და მოტოციკლის აღჭურვილობა
ეს არ არის მხოლოდ წესების დაცვა — ეს შენი სიცოცხლის დაცვაა. ჩაფხუტი, ხელთათმანები, მკლავის და მუხლის დამცავები კრიტიკულად მნიშვნელოვანია, განსაკუთრებით დასაწყისში.
-
სიჩქარეების გადართვა
ვინაიდან მოტოციკლების უმრავლესობას მექანიკური გადაცემათა კოლოფი აქვს, სიჩქარეებს შენით რთავ - ერთდროულად ხელით და ფეხით. მარცხენა სახელურით თიშავ გადაბმულობას და მარცხენა ფეხის სატერფულით ცვლი გადაცემას (სიჩქარეს) - ქვემოთ ჩაწევა გადაცემის შემცირებაა, ზემოთ აწევა - გადაცემის გაზრდა.
-
დამუხრუჭება – რბილად და წინასწარ
გამოიყენე როგორც წინა, ისე უკანა მუხრუჭები ერთდროულად - ეს საკმაოდ მნიშვნელოვანია, რათა მოტოციკლი არ მოცურდეს. ადრეული და რბილი დამუხრუჭება გიცავს მოცურებისგან.
-
სხეულის მოძრაობა მოსახვევში
მოსახვევში შესვლისას ოდნავ გადაიხარე მოხვევის მხარეს, მოადუნე ხელები და სხეულის წონა თანაბრად გადაანაწილე.
და ბოლოს, თავდაპირველად მოტოციკლის მართვის შესწავლა სასურველია, რომ ისეთ ადგილას განახორციელოთ, სადაც ნაკლებად ინტენსიური მოძრაობაა ან სადაც საერთოდ არ არის (დახურული მოედანი, ავტოდრომი).
საუკეთესო მოტოციკლები, რომელსაც A კატეგორიის მართვის მოწმობით ატარებთ
ტოპ 5 საუკეთესო მოტოციკლი დამწყებთათვის:
მეხუთე ადგილი - KTM 200 Duke
კუბატურა: 199.5cc
წონა: დაახლოებით 150 კგ
მაქსიმალური სიჩქარე: ~135 კმ/სთ
-
მოტოციკლი გამოირჩევა თავისი დაბალი ფასით, მსუბუქი წონით და თავის ფასში საკმაოდ შთამბეჭდავი ვიზუალით. ერთი მინუსი, რაც შეიძლება ვთვათ ამ მოდელზე არის მისი ზომა. თუ თქვენ ხართ 185-სმ ზე მაღალი, ეს მოტო თქვენთვის არაკომფორტული იქნება.
მეოთხე ადგილი - BMW G 310 R
კუბატურა: 313cc
წონა: დაახლოებით 158 კგ
მაქსიმალური სიჩქარე: ~145 კმ/სთ
-
BMW-ის ხარისხი შედარებით დაბალ ფასად.
მესამე ადგილი - Yamaha YZF-R 3
კუბატურა: 321cc
წონა: დაახლოებით 169 კგ
მაქსიმალური სიჩქარე: ~180 კმ/სთ
-
ძალიან პოპულარულია მთელ მსოფლიოში. მარტივი სამართავია და იდეალურია როგორც ქალაქში სამოძრაოდ, ისე გართობისთვისაც.
მეორე ადგილი - Honda CB500F
კუბატურა: 471cc
წონა: დაახლოებით 189 კგ
მაქსიმალური სიჩქარე: ~185 კმ/სთ
-
ჰონდას მოტოციკლი გამძლეობისა და ბალანსის გამო, ძალიან ხშირად რეკომენდირებულია ინსტრუქტორების მიერ პირველ მოტოდ.
პირველი ადგილი - Kawasaki Ninja 400
კუბატურა: 399cc
წონა: დაახლოებით 168 კგ
მაქსიმალური სიჩქარე: ~190 კმ/სთ
-
დამწყებთათვის იდეალურია, მაგრამ ეს არც იმას ნიშნავს, რომ მალე მოგბეზრდებათ.
*ჩამოთვლილთაგან ყველა მოტოციკლის ლეგალურად ტარებას შეძლებთ A2 ან A კატეგორიის მართვის მოწმობით, გარდა ბოლო Kawasaki Ninja 400-ისა. ამ მოტოციკლის ტარებას მხოლოდ A კატეგორიის მართვის მოწმობით შეძლებთ.